بداية الكلام بسملة تدي الحكاية بركة
بداية عن نفسي في كلميتن .. فلانة الفلانية يعني من الآخر مش مهم مين
المهم اثبات اني انسانة و خلاص .. مش مهم انتمائي مش مهم باتبع ملة مين
مش سبيل حكمك عليا
حكمك عليا يبقى من احلامي و من طريقة حكمي عالغير
يبقى من افعالي مش كلامي ... يبقى تصرفاتي مش من وعودي
الكلام عمره ما بيصدق و الوعود بالخير مش رباط مقدس
الرباط الحقيقي بالحياة هو فعلك لغيرك .. هو حركتك ساعة السكون
انا زي ما قال عمنا جاهين
"
أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام
عجبي !!!!
"
شايلة هم اني اكون انسانة
بخاف انسى يعني ايه انسان و اغرق في الغابة و تاكلني القروش
اخاف اتوق بين وحوش القرش الطماعين
اخاف اكون طماعة منهم
انا مش بقول اني ملاك ماليش اطماع .. انا انسان نصه ملاك و نصه شيطان و في خناقة بين الاتنين
و انا ما بينهم مطحون
No comments:
Post a Comment