الكباية

أوقات بنكسر الكباية و احنا كان قصدنا نلمعها

و يندلق منها العصير على حياتنا و يبقعها

و نرجع نندم و نقول يا ريتنا ما فكرنا نلمعها

ادينا خسرنا الكباية و اصبحنا بلا معنى 

الكباية كانت غالية و فيها ألف معنى و معنى 

كان جزء كان كريستال 

يعكس صورتنا لما الغناوي تتقال

و نشوف فيه وشوش لينا كان من المحال تبان 

ونشوف صورنا مع بعضنا 

عنينا في وش اللي جنبنا 

و عنيهم و وشهم في عقلنا 

بس انكسر الكريستال و ضاعت الوشوش و العيون و المغنى 

و جزء تاني كان بس أزاز 

نشوف منه لمسافات قدام 

نشوفها من مية زاوية و واوية 

كل زاوية غير التانية 

و كل واحدة فيهم بتثبت ان فيه مشواير قدام

بس انكسرت الكباية و صارت المشاوير أوهام